Os compañeiros do profesor Carlos Buján sorpréndeno cunha homenaxe na Facultade

Compañeiros e colegas do profesor Carlos Buján López, catedrático dende 1979 e fundador da área e da titulación de Filoloxía Alemá na Universidade de Santiago, sorprendérono este venres cunha homenaxe por mor da súa xubilación precisamente no día do seu aniversario. Ao emotivo acto asistiu o claustro docente e persoal traballador da facultade de Filoloxía ademais de colegas doutras universidades que compartiron con el inquedanzas académicas e científicas. Participou tamén o reitor compostelán, Juan Casares, e o decano do centro, Ernesto González. Entre todos eles nun ambiente distendido fixeron unha semblanza do homenaxeado contribuíndo así a dignificar, se cabe aínda máis, a súa faceta persoal e profesional.