O concurso ‘Explícoche Matemáticas 2.0’ abre os prazos da súa cuarta edición

O galego e as matemáticas volven darse a man no concurso ‘ Explícoche Matemáticas 2.0’, que acaba de abrir os prazos da súa cuarta edición promovido pola Facultade de Matemáticas este ano coa colaboración de educaBarrié, a iniciativa da Fundación Barrié para a comunidade educativa. Para participar, cada participante ou grupo preparará un vídeo de dous minutos de duración máxima sobre un tema relacionado coas Matemáticas. A temática e enfoque pode ser máis formal (definición dun concepto, teorema, idea intuitiva ou aplicación) ou recoller manifestacións diversas da matemática na vida cotiá, de carácter cultural, artístico ou social. É condición indispensable que o vídeo estea realizado en lingua galega e que as propostas sexan inéditos e orixinais. As propostas poderán presentarse ata o próximo 8 de abril. O certame organízase en dúas modalidades segundo os participantes: por unha banda o alumnado de calquera das tres universidades galegas procedentes de titulacións de grao ou máster que poderán participar de maneiro individual ou en grupos de como máximo tres persoas; e por outra, estudantado de 3º e 4º de ESO e 1º e 2º de Bacharelato dos centros de educación secundaria de Galicia en grupos dun máximo de tres integrantes coordinados por un/ha docente. Outorgarase un premio por cada categoría, consistente en material informático, audiovisual, didáctico ou educativo, ademais de que se recoñecerá o vídeo mellor valorado por internautas O xurado que valorará os proxectos presentados integrarano a Comisión de Normalización Lingüística da Facultade de Matemáticas, un docente de ensino medio, un representante do Servizo de Normalización Lingüística da USC e un representante da Fundación Barrié. ‘Explícoche Matemáticas 2.0’ promove a utilización do galego como medio de transmisión das Matemáticas, así como a creatividade do alumnado.