Ir o contido principal
STG

O X Curso de Formación Básica en Voluntariado da USC mantén a súa matrícula aberta ata o 27 de setembro

O Curso de Formación Básica en Voluntariado alcanza a súa décima edición promovido polo Servizo de Participación e Integración Universitaria da USC. Desenvolveranse os días 28 e 29 de setembro e os días 5, 6, 26 e 27 de outubro no Campus de Santiago e no Campus lugués nas mesmas datas de setembro ademais de os días 19, 20, 26 e 27 de outubro. As persoas interesadas poden formalizar a súa inscrición ata o 27 de setembro. Cun número de prazas limitado e un custe de matrícula de 60 euros, para poder obter os certificados de aproveitamento só se poderá faltar ao 10% das horas totais do curso, coa obrigatoriedade de entregar unha memoria final dunha extensión mínima de 400 palabras. O curso ten recoñecemento académico para os graos con 2 créditos ECTS e para as licenciaturas e diplomaturas con 2 créditos de libre configuración. En Santiago, o curso desenvolverase na Aula Magna da Facultade de Matemáticas, mentres que en Lugo celebrarase no Salón de Actos da Residencia Universitaria Bal y Gay. Arrancando cunha sesión introdutoria á acción voluntaria, as distintas charlas programadas profundarán á atención á diversidade, inmigración e interculturalidade, voluntariado e idade, cooperación e educación para o desenvolvemento, voluntariado e medio ambiente, TIC e participación social e voluntariado e saúde. O programa completarao un cinefórum e a avaliación do conxunto. Para acadar máis información, todas as persoas interesadas poden consultar os contidos da páxina web do Servizo de Participación e Integración Universitaria na área de ‘Formación e Investigación’ http://www.usc.es/sepiu.

Os contidos desta páxina actualizáronse o 17.09.2012.