Debaten en Económicas sobre as perspectivas fronte ao mercado laboral

A asociación estudiantil JEMSA Junior Empresa de Santiago organizou estes días na Facultade de Ciencias Económicas e Empresariais un debate sobre a situación dos universitarios ao remate das súas titulacións. Participaron a subdirectora de cultura da USC, Mercedes Rosón; a xerente de Proyetsa e diplomada en ADE pola USC, Sonia Alfonsín; a presidenta de Jemsa e estudante de Economía, Lorena Pérez; e José Luis Abadín, piloto de fórmula 2 e estudante de ADE na USC. Mercedes Rosón recalcou a necesidade de achegar en gran medida aos plans de estudos, e en concreto á USC, a práctica empresarial, algo no que coincidiu Alfonsín dada a súa experiencia no estranxeiro e como muller emprendedora. Por outra banda, Jose Luís Abadín falou da importancia de apaixonarse por unha idea e defendela ante todos os hándicaps que poidan xurdir no proceso do emprededurismo. O desaproveitamento do capital humano español foi unha idea da propia presidenta de Jemsa pola que o público se mostrou moi preocupado, ao igual que pola dificultade de acceso a financiamento, sobre todo da mocidade.