O divulgador científico Javier Sampedro intervén cunha conferencia na Facultade de Bioloxía

‘A ciencia do impredicible’ é o título da conferencia que este venres 12 pronunciará na Facultade de Bioloxía o destacado divulgador científico Javier Sampedro Pleite. A charla, aberta a toda a comunidade universitaria, será ás 13.00 horas na Aula Magna da Facultade de Bioloxía. Javier Sampedro (Madrid, 1960), biólogo molecular e xenetista, foi investigador do Centro de Bioloxía Molecular Severo Ochoa de Madrid e do Laboratorio de bioloxía molecular do Medical Research Council de Cambridge. Hai xa case dúas décadas comezou a publicar artigos de divulgación científica no xornal El País, onde dende 1995 traballa como xornalista. Sampedro ten publicados os libros ¿Con qué sueñan las moscas? (Ciencia sin traumas en 62 píldoras) (2004); Deconstruyendo a Darwin, los enigmas de la evolución a la luz de la nueva genética (2006); e El siglo de la ciencia: nuestro mundo al descubierto (2009).