Un equipo da USC faise co terceiro premio do Concurso de Modelización Matemática do Instituto de Matemática Interdisciplinar

‘Descubre o segredo do Sol: Deseña a túa propia célula solar’. Este foi o problema formulado no VII Concurso de Modelización Matemática que organiza o Instituto de Matemática Interdisciplinar e que lle valeu o terceiro premio a Mateo Pérez, Inacio Suárez e Clara Senín, estudantes do grao de Matemáticas e do dobre grao Matemáticas e Física. O equipo da USC competiu nesta sétima edición con 30 universidades, oito delas de fóra do Estado.

A organización decidiu este ano focalizar o problema do concurso nas células solares xa que cada vez son máis empregadas para xerar electricidade. A partir dunha serie de indicacións, os equipos tiñan que formular un modelo que goberne a corrente que se xera nunha célula solar, cun modelo simplificado, para que os estudantado puidese descubrir o comportamento de electróns e ocos mediante ecuacións diferenciais parciais e ordinarias. 

O problema dividiuse en tres partes. Na primeira había que xerar un modelo matemático para a célula solar; a segunda consistiu en explicar cal é a densidade de corrente e debuxar unha gráfica baixo certas condicións de voltaxe da célula solar, e a terceira foi optimizar a célula solar, para maximizar a súa potencia.

O concurso
O concurso conta coa colaboración da Universidade Complutense de Madrid, a compañía de software científico The MathWorks S.L., a Sociedade Española de Matemática Aplicada, a Sociedade de Estatística de Investigación Operativa  e a Rede Matemáticas Industria.

O equipo gañador do primeiro premio provén do dobre grao de Matemáticas e Física da Universidade de Oviedo, e o segundo da mesma titulación da Universidade Complutense.