A Facultade de Administración e Dirección promove o primeiro curso de ‘Opcións, Futuros e Warrants’

A Facultade de Administración e Dirección de Empresas do Campus de Lugo imparte o primeiro ‘ Curso de Opciones, Futuros e Warrants’ que se desenvolverá do 21 ao 25 de febreiro neste centro. As sesións terán lugar en horario de tarde a cargo do analista Miguel Ángel López Mendo e promovidas polo profesor da USC José Federico García González.

Na primeira das xornadas, os asistentes achegaranse a contidos básicos sobre os mercados de derivados, aos obxectivos dos mercados de futuros e á análise das regras do mercado dende o punto de vista destes instrumentos e valores financeiros. Na segunda das xornadas, López Mendo fará unha análise máis profunda sobre os tipos de futuros como as materias primas ou os futuros financeiros, así como do mercado de opcións e as tipoloxías básicas. Na xornada do día 23 realizarase un estudo profundo de mercados de materias primas e de mercados de divisas, incluíndo exemplos de fenómenos coma o ‘corralito’ en Arxentina ou a situación do euro en 2010. Para pechar esta actividade formativa, a sesión do 24 de febreiro dedicarase aos tipos de interese e aos derivados sobre Bolsa realizando unha radiografía das saídas profesionais. Como colofón, a última das xornadas abordará aspectos económicos máis globais mediante o estudo e interpretación dos principais medios de comunicación, e da actualidade da economía mundial e nacional. As persoas interesadas en asistir a este curso ou obter maior información, deben facelo no local de alumnos da Facultade de ADE. A data límite para a inscrición é o día 18 de febreiro.