Filoloxía conmemora o centenario das Irmandades da Fala

Estudantado da Comisión de Cultura da Facultade de Filoloxía organiza as ‘Xornadas de música e xénero nas Irmandades da Fala’, evento que conmemora o centenario deste movemento fundado en maio de 1916. Como o seus organizadores explican, este martes 29, de 17.00 a 20.00 horas, e o mércores 30, de 17.30 a 20.30 horas, o encontro tentará amosar novos xeitos de comprender as Irmandades e o seu tempo.

O programa contempla relatorios, concertos e monólogos teatrais ofrecidos por artistas e estudosas da cuestión como Isabel Rei, Encarna Otero, Elvira Varela Bao, Moncho do Orzán, José Luis Dopico, Laura Tato ou Tero Rodríguez. No Salón de Actos de Filoloxía, Encarna Otero abrirá a quenda de intervencións ás 17.00 horas co relatorio ‘Irmás, galegas e feministas: as mulleres das Irmandades da Fala’ e dará paso a unha conversa con Elvira Varela Bao. Para completar esta primeira sesión, Isabel Rei ofrecerá unha palestra e concerto co lema ‘A música nos tempos das Irmandades: a guitarra galega’.

Xa o mércores 30 Moncho do Orzán abrirá o programa ás 17.30 horas referíndose aos coros galegos no idearium musical das Irmandades e o caso de Cantigas da Terra, a quen seguirán Laura Tato falando sobre ‘As mulleres nos coros populares e no teatro’ e José Luis Dopico Orjais sobre ‘ Jacinta Landa Vaz: a memoria musical dunha época’. A partir das 20.15 horas, Tero Rodríguez ofrecerá o monólogo ‘María Miramontes dende Além’ a a partir dun texto de Ignacio Vilariño.