Filoloxía organiza a Festa das palabras

Dende este xoves 12 e ata o próximo 26 de abril, a Facultade de Filoloxía celebrará a súa Festa das Palabras, un ciclo de actividades concibida ao fío da festividade de Santo Isidoro, patrón deste centro e coñecido pola súa importante obra etimolóxica.

Entre as actividades cómpre destacar a instalación de pósters sobre palabras en distintas linguas realizados por profesorado da Facultade, que se exporán na cristaleira do Salón de Graos do centro a partir deste xoves 12. Ademais, no hall da primeira planta haberá un mural aberto a membros da Facultade e de fóra dela para que poidan amadriñar as súas palabras favoritas en diversas linguas.

O ciclo chegará ao seu remate o día de Santo Isidoro, 26 de abril ás 18.00 horas, cadrando coa entrega de diplomas dos premios extraordinarios de grao e mestrado 2016/2017. Ao peche do acto, intervirá o contacontos Quico Cadaval.