Humanidades rende homenaxe ao catedrático Antonio Rodríguez Colmenero na festa do patrón

A Facultade de Humanidades do Campus Terra da USC celebrou este xoves o acto institucional conmemorativo da festividade do patrón, San Isidoro, unha sesión que serviu tamén para render homenaxe ao catedrático de Arqueoloxía Antonio Rodríguez Colmenero, ao que a Facultade de Humanidades agasallou cunha insignia.

O vicerreitor de Coordinación do campus de Lugo, Javier Bueno; a decana da Facultade de Humanidades, María Isabel González Rey, e a deputada provincial Pilar García Porto, foron os encargados de conducir esta sesión conmemorativa da festividade de San Isidoro, no marco da que o profesor Rodríguez Colmenero ofrecerá o relatorio ‘Voluntario rendemento de contas dun profesor universitario xubilado da súa Facultade de Humanidades’.

Unha vez rematada a quenda de intervencións, os responsables académicos farán entrega do Premio Extraordinario do Máster Universitario en Servizos Culturais, que recolleu Tamara López Fernández. As tituladas o curso pasado con mellor expediente académico nos graos en Ciencias da Cultura e Difusión Cultural, Soraya Martínez Bautista e Sara Rey Vispo, respectivamente, e no grao en Lingua e Literatura Española, Rebeca Villapol Valtar, meredoras tamén desta distinción académica, non participaron no acto.

A celebración da festividade de San Isidoro servu tamén para a clausura da exposición ‘ Galicianas: Mulleres galegas facendo historia, organizada polo presidente da asociación cultural ‘ Vai rañala meu!!’ de Música Tabernaria, Daniel Cánovas. A presentación das actividades de visibilización de mulleres silenciadas ‘Vítimas de violencia machista’ e ‘Mulleres defensoras dos dereitos humanos’, iniciativas coordinadas pola profesora Beatriz Fernández Herrero e a intervención do grupo vocal Solo Voces completaron o programa de actividades desta sesión académica.