A III fase estatal dos concursos ‘Incubadora de sondaxes e experimentos’ resólvese esta semana na USC
En moitos lugares de España puxéronse en marcha nos últimos anos diversos concursos de estatística de ámbito autonómico con características similares e que poderían agruparse baixo a etiqueta de ‘Incubadora de sondaxes e experimentos’. Dirixidos a estudantes de ensinanza secundaria obrigatoria, bacharelato e ciclos formativos, trátase de espertar neles curiosidade pola estatística como ferramenta fundamental na investigación, tanto en ciencias experimentais como en ciencias sociais. A Sociedade Galega para a Promoción da Estatística e Investigación de Operacións (SGAPEIO), en colaboración coa Sociedade de Estatística e Investigación Operativa (SEIO), organiza os próximos 3 e 4 de xullo na Aula Magna da Facultade de Matemáticas da USC a III fase estataldos concursos ‘ Incubadora de sondaxes e experimentos’. Nesta III Fase Nacional participará o estudantado e profesorado titor gañador de todas as fases locais existentes (Andalucía, Ceuta e Melilla, Castela e León, Cataluña, Estremadura, Madrid, Asturias e Galicia) de ESO e Bacharelato. O alumnado será recibido este mércores 3 ás 15.30 horas na Aula Magna de Matemáticas e a continuación participará na sesión de apertura coa presenza da decana da Facultade de Matemáticas, o presidente da SGAPEIO, a vicepresidenta da SEIO e a subdirectora xeral adxunta de Ordenación Académica do Ministerio de Educación, Cultura e Deporte. Xa ás 16.30 horas terá lugar a presentación dos traballos do alumnado de ESO: ‘Unha competición estatística entre avións de papel’, do IES Juan del Villar (Arjonilla. Andalucía e Ceuta e Melilla); ‘O sector bovino no coello de Valdés’, do IES Carmen y Severo Ochoa (Luarca. Asturias); ‘¿Qué resistencia ten a madeira?’, do Colexio Bon Salvador (Sant Feliu de Llobregat. Cataluña); ‘Onde o Bierzo se chama Cabrera’, do IESO de Puente Domingo Flórez (León. Castela e León); ‘Estudo estatístico, do Colexio Diocesano San Atón (Badajoz. Estremadura); e ‘¿E ti como comezas o día?’, do IES A Xunqueira 1 (Pontevedra. Galicia). Xornada do xoves 4 Os traballos de bacharelato e ciclos formativos presentaranse o xoves 4 ás 9.30. É a quenda de ‘Investigación operativa para a codificación e decodificación de mensaxes’ do IES Jovellanos (Xixón. Asturias); ‘A mediana, ¿estatística ou xeometría?’ de El Carmelo (Granada. Andalucía e Ceuta e Melilla); ‘A concienciación dos alumnos do Colexio Sant Miquel no uso do papel de prata. Novas medidas para reducir o seu uso’ do Collegi Sant Miquel (Barcelona. Cataluña); ‘¿Ten a xuventude hábitos saudables?’ do IES Politécnico de Soria (Soria. Castela e León); ‘Estudo sobre as precipitacións en Badaxoz entre 1958-2004’ do IES Virgen del Soterraño (Barcarrota. Estremadura); e ‘¿Somos o que comemos?’ do IES Ignacio Elacuria (Alcalá de Henares. Madrid).
Ao remate, e logo da presentación do Ano Internacional da Estatística a cargo de Mathieu Kessler, da Universidade Politécnica de Cartaxena, coñecerase o ditame do xurado, composto nesta ocasión pola vicepresidenta de Estatística da SEIO, Lola Ugarte Martínez; a subdirectora xeral adxunta de Ordenación Académica do Ministerio de Educación, Cultura e Deporte, Mª Ángeles Gil Blanco, e o propio Mathieu Kessler.