Unha investigación de Humanidades analiza a pegada deixada en Galicia pola saga de prateiros lusos dos Cedeira entre 1542 e 1667
A actividade profesional desenvolvida pola saga dos Cedeira, una familia de prateiros procedentes de Portugal que acaparou durante boa parte da produción de pratería en Galicia nos séculos XVI e XVII, centra a temática da tese de doutoramento ‘Prateiros portugueses en Galicia. O obradoiro dos Cedeira (1542-1647)’, desenvolvida pola investigadora cántabra Diana Dúo Rámila baixo a dirección da profesora da USC na Facultade de Humanidades de Lugo Ana Goy Diz.
A tes de doutoramento que vén de defender na Facultade de Humanidades do campus de Lugo Dúo Rámila analiza as claves de cómo os Cedeira conseguiron, xeración tras xeración, manter e consolidar o seu prestixio en Galicia grazas, en grande medida, a que exercían o control de todo o proceso de explotación, fabricación e comercialización da prata. Esta investigación, que abrangue un período de 125 anos, analiza polo miúdo a traxectoria dunha das familias de ourives lusos máis importantes. Neste estudo, no que a súa autora transcribiu 650 documentos de distintos arquivos de Galicia, Dúo Rámila fai tamén un exhaustivo seguimento da traxectoria de 28 prateiros membros da referida dinastía, o que lle permite catalogar ata 34 obras de ourivería atribuídas a esta familia. O interese do traballo desenvolvido por Diana Dúo semella maior polo feito de que ata a data non existía ningún estudo específico sobre a dinastía dos Cedeira, unha salga de prateiros que da que se ten a noticia en Galicia por vez primeira no ano 1542. Esta familia estableceuse fundamentalmente en Santiago de Compostela e en Vigo, desde onde atendían encargos procedentes de toda Galicia, subliña a autora, quen precisa que o estudo por ela desenvolvido permitiulle atopar referencias desta familia de prateiros noutras localizacións galegas como o son Redondela, Pontevedra, Salvaterra ou Tui. Descendentes dos primeiros Cedeira chegados a Galicia traballarían ao longo destes 125 en centros localizados en Villafranca del Bierzo, Ponferrada, León, Oviedo ou mesmo en Madrid, apunta asemade Diana Dúo nunha tese de doutoramento que permite cubrir parte das lagoas documentais existentes sobre a ourivería en Galicia, un arte que no século XVI gozou de gran esplendor e importancia en todo o territorio nacional. Respecto da periodicidade do estudo feito por Diana Dúo, esta investigadora subliña que cinguiu a súa análise sobre os Cedeira a 1667, por coincidir esta data coa do pasamento dun dos prateiros máis emblemáticos da familia. Esta investigadora sinala asemade que, aínda que cómpre pensar que a actividade desta familia de prateiros portugueses puido ter continuidade ao longo do século XVIII, o arte da pratería entrou en declive a finais do século XVII por mor dunha crise económica xeneralizada que deparou un descenso de demanda, así como polas sucesivas pragmática promulgadas contra o luxo promulgadas polos distintos monarcas da época. Tribunal da tese e cualificación O tribunal encargado de avaliar a tese de doutoramento presentada e defendida por Diana Dúo estivo presidido polo catedrático do Departamento de Historia do Arte da USC José Manuel García Iglesias. Juan Manuel Monterroso, Yayoi Kawamura, María Pilar Mogollón e Rosa Consolación Martín tamén formaron parte do tribunal, que cualificou con sobresaínte cum laude a investigación desenvolvida por Diana Dúo Rámila.