O investigador e académico mexicano da lingua José Luis Díaz diserta sobre a conciencia onírica en Humanidades
O investigador, profesor, ensaísta e membro da Academia Mexicana da Lingua José Luis Díaz ofrecerá este venres, a partir das 12.00 horas, no salón de graos da Facultade de Humanidades, o relatorio ‘A conciencia onírica e a representación dos soños’.
O director da Cátedra Valente de Poesía e Estética da USC, que é a organizadora desta actividade, o profesor da Facultade de Humanidades, Claudio Rodríguez Fer, e a videcana da Facultade de Humanidades, JoDee Anderson foron os encargados de presentar a José Luis Díaz, quen precisamente vén de visitar e consultar o arquivo e a biblioteca de Valente en relación co tema dos soños na obra da filósofa María Zambrano. Autor de numerosa bibliografía, José Luis Díaz, descendente de exiliados galegos, ten abordado na súa ampla produción escrita asuntos humanísticos relacionados coa antropoloxía e coa historia, como mostran os seus libros Psicoloxía e conduta. Rotas dunha indagación (1989), A mente e o comportamento animal (1994), O ábaco, a lira e a rosa. As rexións do coñecemento (1997), A fuxida da cobra. Quetzalcoatl resucitado (2006) ou A conciencia vivinte (2007). José Luis Díaz estudou Medicina na Universidade Nacional Autónoma de México (UNAM), onde obtivo o título de médico ciruxán e logo ampliou estudos sobre psicobioloxía na Universidade de Harvard, na que tamén foi membro asociado dos laboratorios de investigación psiquiátrica, ademais de investigador do Instituto de Investigacións Biomédicas e do Centro de Neurobioloxía da UNAM. Exerceu como investigador asociado no Instituto Nacional de Neuroloxía e no Instituto Nacional de Psiquiatría de México, así como foi profesor visitante do Programa de Ciencia Cognitiva da Universidade de Arizona e das Facultades de Psicoloxía e Filosofía da Universidade de Santiago de Compostela. Dende 2004 é investigador no Departamento de Historia e Filosofía da Medicina da Facultade de Medicina da UNAM, e titor nos posgraos de Neurobioloxía e de Filosofía da Ciencia Cognitiva nesta mesma universidade. Este prolífico autor e investigador ten reivindicado de xeito exemplar a memoria do seu tío Manuel Díaz, alcumado como o médico dos pobres do Incio, que foi asasinado en 1936. A el dedicou a obra Sementeira e Memoria. Represalia e desagravio dun médico lugués republicano, publicada en galego por Edicións do Castro no ano 2009, e dous anos despois, en castelán, polo Fondo da Cultura Económica de México baixo o título Siembra e Memoria. Muerte y evocación de un médico republicano.