Maria J. Matos, unha das voces escollidas polo ‘Journal of Medicinal Chemistry’ para fomentar vocacións científicas entre as máis pequenas

A investigadora da USC Maria J. Matos é unha das voces que integran a editorial ‘Empowering Voices: Inspiring Women in Medicinal Chemistry’, publicado no Journal of Medicinal Chemistry. Co gallo do 8 de marzo, o Día Internacional das Mulleres, o artigo atópase integrado por diversas científicas especializadas en química terapéutica que relatan historias arredor de que foi o que as motivou para entrar nese eido investigador. “Proporcionar modelos a seguir, alento e inspiración ás demais” é o obxecto desta iniciativa na que Maria J. Matos é a única investigadora asinante que pertence a unha universidade española.  Así, as contribucións resaltan as súas paixóns e motivacións, así como como “o seu amor polas ciencias e o seu impulso para mellorar a saúde humana contribuíndo á investigación básica e creando fármacos que salvan vidas”.

Maria J. Matos relata no artigo como a curiosidade marcou a súa infancia, formulándose cuestións sobre por que o arco da vella ten tantas cores ou por que a comida goza de diferentes sabores. Unha feira científica á que asistiu con nove anos foi clave na elección do seu futuro. Así, quedou fascinada ao ver, por exemplo, a faísca producida polo sodio na auga. Nese intre, a investigadora da USC descubriu que quería ser científica.

Anos máis tarde, desenvolveu a súa paixón pola química terapéutica, un eido que ela define como “multidisciplinario e con infinitas fronteiras”.  Esta é unha disciplina, continúa Maria J. Matos, que tende pontes coa química, farmacoloxía e biomedicina dando lugar a “unha contorna creativa con complementarias áreas de coñecemento”. A profesora explica como traballa no ámbito das enfermidades neurodexenerativas, tentando atopar solucións terapéuticas a enfermidades complexas.