Oito mil estudantes de bacharelato se achegaron ao stand da USC no 'Forum Orienta 2007'

O posto informativo que a USC tiña emprazado no ‘Fórum Orienta 2007’ celebrado esta semana no Palacio de Congresos e Exposicións de Galicia, en Santiago, recibiu a visita de oito mil estudantes de bacharelato interesados en coñecer a actividade formativa e de servizos da institución.
A Universidade compostelá tiña dividido o seu stand en varias áreas dedicadas ás Ciencias da Saúde, Sociais e Xurídicas, Experimentais, Humanidades e unha exclusiva na que se informaba dos títulos propios. Ademais, durante os catro días do fórum os estudantes tiveron a oportunidade asistir a demostracións prácticas sobre a metodoloxía que se utiliza nos xacementos arqueolóxicos, un experimento de Química e unha sesión informativa sobre a vida diaria dos universitarios nos Campus de Santiago e de Lugo, esta última organizada polo Programa ‘A Ponte’.
Xa entre as actividades de carácter lúdico, a USC ofreceulles aos estudantes de bacharelato exhibicións deportivas de capoeira, Tai-Chi, danza do ventre e esgrima, así como unha representación dunha peza teatral a cargo do grupo de teatro desta universidade.
Ao longo deste encontro educativo visitaron o stand da Universidade de Santiago o vicerreitor de Relacións Institucionais, os decanos de Química, Ciencias da Comunicación, Filoloxía e Psicoloxía e a vicedecana de Bioloxía, entre outros.