A profesora María Dolores Álvarez Pérez tomou posesión do seu cargo como vicerreitora de Calidade e Planificación
A profesora María Dolores Álvarez Pérez tomou posesión este xoves, día 10, do seu cargo como vicerreitora de Calidade e Planificación nun acto protocolario celebrado no Salón de Graos do Colexio de San Xerome e presidido polo reitor da USC, Senén Barro. A profesora Álvarez Pérez substitúe no cargo a Mª Paz García Rubio. No mesmo acto tamén tomaron posesión a vicerreitora adxunta de Oferta e Xestión Académica, María Begoña Barreiro Fernández, e o vicerreitor adxunto de Investigación e Proxección Exterior, Agustín Merino García.
A nova vicerreitora de Calidade agradeceu o intenso labor desenvolvido pola súa predecesora no cargo xa que o traballo desenvolvido resulta unha base indispensable para os retos dos próximos tres anos. Neste senso, María Dolorez Álvarez Pérez destacou a necesidade de manter a colaboración coas distintas universidades universitarias, avanzar na mellora e na certificación da calidade dos servizos de administración e servizos, consolidar o Plan de Desenvolvemento Sostible e desenvolver unha estrutura informativa que facilite a toma de decisións no seo da USC.
Pola súa banda, o reitor compostelán ratificou o seu agradecemento e o do conxunto da comunidade universitaria ao compromiso e fidelidade co que Mª Paz García Rubio desenvolveu o seu traballo á fronte da vicerreitoría de Calidade e Planificación. Senén Barro tamén salientou que a pluralidade do actual consello de Dirección permite unha visión de conxunto da USC que redunda directamente nun mellor contexto para a toma de decisións.
Dolores Álvarez PérezDolores Álvarez Pérez é profesora dende o curso 1993-1994 nas licenciaturas de Ciencias Empresariais e Administración e Dirección de Empresas, así como en cursos de posgrao. Ao longo da súa traxectoria profesional, Mª Dolores Álvarez Pérez traballou fundamentalmente en tres campos, o da calidade, a dirección estratéxica de recursos humanos e o goberno corporativo.
Nestes campos céntrase tamén a súa investigación, publicada en revistas de ámbito nacional e internacional. Tamén é referee de varias revistas académicas, algunhas de gran prestixio como Corporate Governance: An International Review. Colaborou con Correos y Telégrafos, SA na avaliación do seu sistema de calidade mediante o modelo EFQM e, durante sete anos antes de incorporarse á Universidade, desempeñou postos de xestión en empresas como Televés, SA ou en organizacións sen animo de lucro como a Real Sociedad Económica de Amigos del País.
Begoña Barreiro FernándezBegoña Barreiro é profesora no Departamento de Organización de Empresas e Comercialización na Facultade de Administración e Dirección de Empresas do Campus de Lugo. Licenciouse e doutorouse en Ciencias Económicas e Empresariais pola Universidade de Santiago. Imparte docencia dende o ano 1995 na Licenciatura de Administración e Dirección de Empresas, na Diplomatura de Estudos Empresariais e na Licenciatura de Tecnoloxía dos Alimentos, todas elas en Lugo. Con anterioridade a súa designación foi vicerreitora adxunta de Investigación e Proxección Exterior e secretaria da Facultade de Administración e Dirección de Empresas de Lugo.
As súas investigacións céntranse nas tomas de decisións multicriterio, na problemática da empresa familiar e na análise das características dos emprendedores. É membro da Cátedra da Empresa Familiar da USC e vocal do Ilustre Colexio de Economistas de Lugo.
Agustín Merino GarcíaAgustín Merino é doutor en Biloxía pola USC e fixo unha estadía na Universidade de Göttingen co programa Human Mobility. Pertence ao Departamento de Edafoloxía e Química Agrícola da Escola Politécnica Superior do Campus de Lugo onde imparte clases de Degradación e Conservación do solo e é vicepresidente do Insituto Europeo do Bosque Cultivado.
As súas liñas de investigación están enfocadas cara a xestión forestal, eido no que dirixe varios traballos nacionais e internacionais. Ademais é editor temático da ‘European Journal of Forest Research’.