A profesora de Matemáticas Rosana Rodríguez protagoniza un novo mural do proxecto valenciano ‘Dones de ciència’
A profesora da área de Análise Matemática Rosana Rodríguez López acaba de ser homenaxeada a través do proxecto ‘Dones de ciència’, unha iniciativa da Universitat Politècnica de València xunto co centro de innovación Las Naves do concello de València co apoio da FECYT. A iniciativa contribúe dende hai tres anos a visibilizar e homenaxear “a grandes mulleres de referencia nacional e internacional nos seus respectivos campos de investigación, a través da mirada de grandes mulleres tamén da pintura mural”.
Así, a investigadora e matemática da USC é protagonista dun retrato mural no IES Conselleria en València realizado pola pintora andaluza Carmen Morillo. “Síntome tremendamente agradecida e resulta unha inmensa honra” ter sido protagonista desta iniciativa, afirmou Rosana Rodríguez durante a inauguración do seu mural. Na mesma liña remarcou a importancia de “fomentar a visibilización para alcanzar a igualdade, pois historicamente as mulleres teñen estado nun plano menos visible que os seus compañeiros aínda compartindo logros. E é tremendamente importante fomentar que as mulleres poñan de manifesto o seu potencial en todos os ámbitos, na ciencia e en calquera tipo de actividade profesional que as faga sentirse realizadas".
No mural sobresae un retrato en primeiro plano de Rosana Rodríguez sobre uns diagramas que remiten á investigación da matemática galega, centrada nas ecuacións diferenciais. Respecto á técnica, destaca unha pincelada moi fresca e colorista, trazos característicos da obra de Carmen Morrillo. Durante a súa inauguración, a profesora da da USC agradeceu a elección da rama de Matemáticas para este proxecto e defendeu a súa importancia na vida cotiá, “proporcionan modelos para predicir a evolución de numerosos fenómenos, na meteoroloxía, economía ou epidemias, ademais de achegarnos ferramentas para facer que as operacións que realizamos a diario sexan seguras, sen esquecer que fomentan a nosa capacidade crítica ante a información que recibimos”, enumerou a modo de exemplos.