O Proxecto de Estímulo do Talento Matemático para alumnos de terceiro e cuarto da ESO inicia as sesións deste curso en Guitiriz

Ofrecer aos alumnos de 14 e 15 anos que remataran o Proxecto de Estímulo do Talento Matemático, Estalmat PI, actividades para continuar coa afección polas matemáticas. Este é o principal obxectivo do programa que se inicia este sábado 22 de xaneiro en Guitiriz (Lugo). Trátase da última etapa do Estalmat Galicia, un programa pilotado pola Facultade de Matemáticas da USC, que está dirixido a estudantes de 12 e 13 anos. A decana da Facultade de Matemáticas, María Vitoria Otero, e responsables do Estalmat, xunto a alcaldesa de Guitiriz, Regina Pollín, dirixiranse aos participantes a partir das dez da má. A continuación, o profesor e reitor da Universidade da Coruña, José María Barja, falará aos alumnos sobre a ‘Matemática dos códigos cotiás’, na Casa Habanera. O Estalmat PI, que por estar dirixido a alumnos de 3º e 4º da ESO toma o nome do número Pi (3,14...), terá outras dúas sesións. Unha delas será o vindeiro 19 de febreiro, no Museo Ramón Aller de Lalín (Pontevedra), a cargo do director do Observatorio Astronómico da USC, José Docobo. Pola súa banda, Felipe Gago, matemático da Universidade de Santiago, impartirá a terceira e última sesión do Estalmat PI 2010-2011, que se realizará tamén en Guitiriz. Estalmat A actividade principal do Proxecto de Estímulo do Talento Matemático, Estalmat Galicia, céntrase en seleccionar cada ano a 25 estudantes galegos de 12 e 13 anos mediante unha proba, igual en toda España, a que veñen acudindo 200 rapazas e rapaces. Os alumnos participantes dispoñen de actividades matemáticas nas mañás dos sábados, impartidas na Facultade de Matemáticas da USC por un equipo de 25 profesores de ensino secundario e universitario. A rede conta coa súa propia páxina web, http://estalmatgalicia.com, na que se recolle todo o traballo desta plataforma.