O reitor da USC participa en Medellín na xuntanza da Xunta Directiva da Rede Columbus

O reitor da Universidade de Santiago, Senén Barro, participará os días 12 e 13 na reunión que a Xunta Directiva de Columbus vai celebrar na Universidade colombiana de Antioquía en Medellín.
Columbus é un programa de cooperación universitaria entre institucións de educación superior europeas e latinoamericanas creado en 1987. O seu obxectivo principal é a promoción do desenvolvemento institucional e a cooperación multilateral para axudar ás universidades a responder aos desafíos relacionados coa escasez de recursos, a masificación, as demandas de diversificación ou a internacionalización.
Nesta rede están implicadas medio cento de institucións universitarias de Alemaña, Arxentina, Bélxica, Brasil, Chile, Colombia, Costa Rica, España, Francia, Italia, México, Países Baixos, Perú, Portugal e Venezuela.
A Xunta Directiva de ColumbusA Xunta Directiva de Columbus está integrada por oito membros designados pola Asemblea Xeral por un período de dous anos a razón de catro membros europeos e outros tantos de universidades latinoamericanas. Na actualidade, xunto ao reitor compostelán integran este órgano directivo representantes de Alemaña, Arxentina, Chile, Colombia, Italia, México e Portugal.
No encontro previsto para este xoves e o venres, a Xunta Directiva analizará o informe financeiro correspondente a 2006 e o grao de desenvolvemento das distintas actividades programadas para o presente ano e para 2008. Ademais tratarase a actividade e o orzamento da Asociación Columbus Torino- Forum Euro-Latinoamericano, entre outros asuntos.