Relatorios, música, premios ou teatro dan voz á axenda reivindicativa da USC no 8M

‘Investir nas mulleres: acelerar o progreso’ é o lema baixo o que a Organización das Nacións Unidas conmemora en 2024 o Día Internacional das Mulleres que cada ano se desenvolve o 8 de marzo. Co gallo desta xornada a prol da igualdade, a USC deseñou unha axenda de actividades coas que outorgar visibilidade a estas reivindicacións e que consta de dous actos centrais nos campus de Santiago e Lugo, así como de múltiples actividades nos diferentes centros da USC.

A lectura do manifesto da Rede de Unidades de Igualdade de Xénero para a Excelencia Universitaria (RUIXEU) centrará o acto que terá lugar o 6 de marzo no Salón Nobre do Colexio de Fonseca, ás 12.00 horas. A sesión presidida pola delegada do reitor para a Igualdade, Marta Pérez Pereiro, servirá para homenaxear a Unidade de Atención Psicolóxica pola súa traxectoria en prol da igualdade de xénero na USC. No transcurso do acto, pronunciarase o relatorio ‘'Muller e Saúde Mental’.

No Campus de Lugo, a artista e cantautora galega María Xosé Silvar, Sés, ofrece este mércores 6 de marzo, a partir das 19.00 horas, no Salón de Actos 'Profesora Ana Goy Diz' da Facultade de Humanidades, o relatorio 'Feminidade e industria musical'. A palestra é de acceso libre, de balde e aberta á participación de todo o público interesado.

Programa en Lugo

Alén dos actos centrais, os centros organizan múltiples actividades ao longo dos vindeiros días co gallo desta xornada reivindicativa. A Escola Politécnica Superior de Enxeñaría do Campus de Lugo acollerá o xoves 7, ás 13.00 horas, a entrega dos premios 'Enxeñaría e Muller Rural'. Ese mesmo día, ás 11.00 horas, Administración e Dirección de Empresas será o escenario no que se desenvolva a conferencia 'Dificultades e retos de emprender en feminino', a cargo de Noa Piñeiro López, directora de Estudio BO. Humanidades acollerá en idéntico día e horario o relatorio 'A plasticidade da organizacion familiar, caboverdiana e das relacións de xénero nun contexto migratorio entre Santiago e Galicia' de Luzia Oca González. A continuación e a partir das 12.15 horas, Antonella Sturla abordará nesta mesma Facultade 'Dende as marxes: teatro, mulleres e poder. Omisións, narracións e revolucións na escritura doutra historia do teatro'.

Unha mesa redonda integrada por deportistas profesionais que presentarán a súa visión sobre as implicacións de ser muller na súa carreira profesional será o acto central da Facultade de Ciencias. A sesión que ten lugar o día 8, a partir das 10.00 horas, conta coa colaboración de egresadas da Facultade de Ciencias que desenvolven a súa actividade laboral axudando e asesorando mulleres deportistas dende o ámbito da nutrición e da promoción da actividade física.

A Charla coloquio 'Mulleres bravas, defensoras da terra en Galicia e Honduras' terá lugar o 11 de marzo ás 12.00 horas, na EPS de Enxeñaría. Este centro tamén acollerá o 14 de marzo, á mesma hora, o inicio do II Foro de Enxeñeiras. Esta é unha xornada formativa enfocada ao intercambio de experiencias e de coñecementos técnicos, na que se lles dará a palabra a relatoras de diversas áreas profesionais da enxeñería. Esta actividade resalta o papel fundamental das mulleres na industria e dálles un espazo de debate e de exposición de ideas para conectar cun público na súa maioría en proceso de formación.

Programa en Santiago

A Facultade de Psicoloxía acolle dende este luns 4 e ata o mércores 6, a exposición das obras pertencentes ao ‘II Concurso de expresión artística do feminismo da Facultade de Psicoloxía’. Durante o tempo de exposición das obras estará dispoñible a votación para o alumnado, profesorado e persoal de administración e servizos da Facultade a través dun formulario virtual ao que se pode acceder mediante un código QR situado no centro onde se elixirán ata tres obras da exposición. A votación será anónima. As tres expresións artísticas máis votadas serán consideradas finalistas do concurso con opción a premio. A decisión da votación popular será publicada na páxina web da Facultade o xoves 7 de marzo. No suposto de que se produza un empate nas votacións finais, que impida a selección das 3 obras finalistas, un xurado conformado polos membros da Comisión de Igualdade de Xénero decidirá sobre o ditame do desempate. Os premios serán entregados nun acto público que terá lugar o venres 8 de marzo, ás 13.00 horas no Salón de Actos da Facultade. As tres obras finalistas formarán parte dunha exposición temporal que se instalará no centro durante todo o mes de marzo de 2024. Con anterioridade, ás 12.00 horas, darase lectura ao manifesto RUIXEU diante do módulo A da Facultade.

Pola súa parte, Ciencias Políticas e Sociais acolle este martes 5 a conferencia 'Diálogos sobre a política e o corpo: unha aposta editorial de La Sociocultural'. A finalidade do acto que comezará ás 17.30 horas é presentar este proxecto que desexa fomentar o diálogo comunitario e contribuír a fortalecer o tecido social.

A presentación da peza de teatro 'As alumnas' da escritora Paula Carballeira, Premio Nacional de Literatura Dramática 2023 e Premio Follas Novas 2023, terá lugar na Facultade de Filoloxía o 7 de marzo, ás 13.00 horas. Xusto antes, darase lectura ao manifesto da RUIXEU na entrada do centro. Entre as 11.00 e as 13.00 horas, o centro albergará un punto informativo sobre actividades e recursos da Comisión de Igualdade da Facultade de Filoloxía. A lectura do manifesto será tamén parte integrante da axenda doutros centros como é o caso da Facultade de Medicina e Odontoloxía, o venres 8 de marzo as 13.30 horas, no Salón de Actos; ou da de Química, na Aula Magna, ás 13.00 horas.

Un mural homenaxe a mulleres destacadas no ámbito das relacións laborais e dos recursos humanos centrará a actividade da Facultade de Relacións Laborais co gallo do 8M. O que se pretende é resaltar o valor de diferentes figuras femininas que foron e/ou son un referente que cómpre seguir no eido das relacións laborais e das organizacións. Para participar so é necesario que o estudantado envíe unha fotografía daquela muller/es que considere un referente neste área acompañada cun pequeno texto (máximo 25 palabras) explicando por que a considera un referente. Posteriormente, as fotografías co texto que as acompañan exporanse nos paneis do centro.

Tamén co gallo do 8M, o Arquivo Histórico Universitario acolle a exposición ‘AstrónomAs’ que divulga o traballo que realizaron ou realizan preto de 300 mulleres de todo o mundo no ámbito científico que dá nome á mostra. Estruturada en catorce disciplinas, a mostra, que conta cunha versión en liña, pretende fomentar vocacións científicas e tecnolóxicas, fundamentalmente, entre as nenas e adolescentes; divulgar as investigacións realizadas por mulleres científicas na astronomía e astrofísica, así como dar a coñecer as perspectivas futuras nestes campos. Comisariada pola que fora profesora da área de Astronomía e Astrofísica no departamento de Matemática Aplicada da USC, Josefina Ling Ling, poderá visitarse no AHUS ata o vindeiro 22 de marzo, de 9.00 a 14.00 horas.

O arquivo únese así a esta iniciativa cedendo o espazo expositivo e dotando de contexto á mostra a través do acto que terá lugar o 8 de marzo ás 17.30 horas, baixo o lema ‘Historias de Mulleres: Antonia Ferrín Moreiras, a primeira muller astrónoma de Galicia’. A sesión presidida por Elena Cendón Vázquez, decana da Facultade de Matemáticas da USC, contará con dúas relatoras, a propia Josefina Ling Ling e Matilde Ríos Fachal, profesora e investigadora, que abordarán distintos aspectos da biografía de Ferrín Moreiras e da súa estreita vinculación co Observatorio Astronómico e a Facultade de Matemáticas da USC.