Unha representación da USC asistiu á reunión anual da Asociación Universitaria Iberoamericana de Postgrado

A vicerreitora de Titulacións e Internacionalización, María José López Couso, por delegación do reitor, representou a USC os días 16 e 17 de maio nas asembleas ordinaria e extraordinaria da Asociación Universitaria Iberoamericana de Postgrado (AUIP), que se desenvolveu en Sevilla. A USC incorporou á entidade en marzo de 2022 na reunión celebrada en Barranquilla (Colombia).

As xuntanzas, organizadas pola Universidade de Sevilla, desenvolvéronse no Pavillón de México e reuniron representantes de 302 universidades de máis dunha vintena de países da Comunidade Iberoamericana de Nacións, tendo como obxectivo consolidar o Espazo Iberoamericano do Coñecemento, contribuíndo con criterio de alta calidade académica á formación de profesorado universitario, persoal científico e profesionais nos estudos de mestrado e doutoramento.

Durante os dous días do encontro a vicerreitora María José López Couso e a adxunta para Internacionalización, Belén Méndez Naya, mantiveron reunións coa directora xeral da AUIP, Chantal Pérez Hernández, e con representantes de diversas universidades da asociación coa finalidade de explorar as oportunidades que ofrece a asociación para o estudantado de posgrao (axudas de mobilidade, doutoramentos colaborativos, premios ás teses de doutoramento, entre outras) e para fortalecer os vínculos da USC coas universidades socias.

Na asemblea extraordinaria, celebrada o venres 17 de maio, foi elixida a nova executiva da asociación, baixo a presidencia do reitor da Universidade Pablo de Olavide (Sevilla), Francisco Oliva, que substitúe no cargo o reitor da Universidade de Sevilla, Miguel Ángel Castro Arroyo.