Sesión informativa sobre a convocatoria de Expresións de Interese para o EUniWell Champions Scheme

A Universidade Europea para o Benestar (EUniWell), na que se integra a USC, mantén aberta a  primeira convocatoria de Expresións de Interese para o EUniWell Champions Scheme. Trátase dun programa que coordina a Universidade de Santiago e que está dirixido a persoal investigador sénior interesado en asumir un rol de liderado a curto prazo na promoción da misión de EUniWell, tanto dentro como fóra desta alianza europea de universidades.

Nesta convocatoria, as persoas seleccionadas, que actuarán como embaixadoras da alianza EUniWell, recibirán un orzamento de ata 15.000 euros para apoiar as súas actividades durante un período de seis meses. O prazo de solicitudes permanecerá aberto ata o 28 de febreiro ás 17:00 horas e o resultado final anunciarase a finais do mes de abril.

Sesión informativa
A fin de orientar sobre o proceso de solicitude e os criterios de selección, EUniWell organiza una sesión informativa en liña o vindeiro luns 3 de febreiro ás 11 horas. As persoas interesadas poderanse conectar a través da ligazón de Teams dispoñible na páxina web do consorcio. Recoméndase inscribirse con antelación no enderezo: euniwell.wp8 [at] usc.gal (euniwell[dot]wp8[at]usc[dot]gal).