Un total de sete estudantes da USC integran a nova promoción do programa de Doutoramentos Industriais da Xunta de Galicia
Daniel Arias Ferreiro, Gabriel Otero Moreira, Alejandra García Calvo, Patricia Hermida Sestayo, Marta Pereira Ferrer, Rocío Cordeiro Rey e Pablo Rodeiro Otero conforman a participación da USC na nova promoción do programa de Doutoramentos Industriais da Xunta de Galicia. Ao abeiro desta iniciativa, o estudantado poderá realizar as súas respectivas teses de doutoramento en empresas ou centros tecnolóxicos.
A USC encabeza o número de doutoramentos industriais con sete estudantes na presente promoción, seguida da UVigo con cinco e da UDC con dous. Bioloxía, enxeñaría, física, informática e química son as áreas de coñecemento nas que se concentran as investigacións a desenvolver nesta edición.
Ademais de potenciar a captación de talento e a creación de emprego de calidade, os Doutoramentos Industriais tamén promoven a transferencia de coñecemento das universidades ao tecido produtivo e fomentan a realización de proxectos de investigación industrial en empresas. Estimula, así mesmo, a incorporación do persoal doutor nestas entidades unha vez que remata a axuda, dándolle continuidade á bolsa da Xunta.
Os proxectos de investigación das teses buscan resolver as necesidades e retos da empresa ou centro tecnolóxico receptor. As axudas cobren os custos de contratación e os gastos relacionados co proxecto tanto na universidade como na empresa, ao tempo que ofrecen apoios para a realización de estadías de tres meses no estranxeiro.
Ao longo do tempo, levan xa colaborado con esta iniciativa un total de 61 empresas e 15 centros tecnolóxicos do conxunto da Comunidade galega, sendo 43 alumnos da USC, 20 de UVigo e 13 da UDC.