O taller ‘Valle-Inclán na aula’ aborda en Humanidades novos métodos e recursos para a ensinanza da literatura

A Facultade de Humanidades do campus de Lugo celebra este venres 5 de abril o seminario ‘ Valle-Inclán na aula. Actualización de contidos e metodoloxías para a ensinanza da literatura’, a través do que se pretende achegar aos asistentes novas metodoloxías e instrumentos acaídos para a ensinanza da literatura nas aulas.

Esta xornada, organizada polas profesoras da Facultade de Humanidades da Universidade de Santiago Rosario Mascato Rey e Amparo de Juan Bolufer, encádrase dentro das diferentes xornadas de transferencia do coñecemento e formación continua que vén desenvolvendo o centro universitario lugués. As últimas liñas do traballo docente no eido das Humanidades propostas co gallo da integración no Espazo Europeo de Ensino Superior, a actualización de contidos referidos á figura é a traxectoria de Valle-Inclán, a dispoñibilidade de materiais dixitais na rede e o deseño, implantación e o emprego na aula de materiais específicos sobre a figura de Ramón del Valle-Inclán serán os temas sobre os que versarán os relatorios dos tres especialistas convidados a participar nesta sesión. Esta nova actividade promovida pola Facultade de Humanidades vai dirixida ao profesorado de secundaria, así como aos docentes de español para estranxeiros, titulados en Filoloxía, Humanidades e Formación do Profesorado, ademais de estudantes de grao e licenciatura. A inscrición neste taller é gratuíta e os interesados poden formalizar xa a súa matrícula a través do enderezo de correo electrónico rosario.mascato [at] usc.es (rosario[dot]mascato[at]usc[dot]es). Os solicitantes deben achegar os seus datos persoais e o número do D.N.I, ademais de indicar a súa categoría profesional. Programa e relatorios O seminario ‘Valle-Inclán na aula’ desenvolverase o 5 de abril en quenda de tarde, de 16.30 a 20.30 horas, na Facultade de Humanidades do campus de Lugo. A decana deste centro universitario, María Isabel González Rey, será a encargada de inaugurar a xornada, na que logo intervirán como relatores os profesores Xaquín Núñez Sabarís, Rosario Mascato Rey e Cristina Villarmea Álvarez. ‘A ensinanza da literatura no contexto de Boloña: cara un enfoque competencial. Mapeando ‘ Luces de Bohemia’, é o título do relatorio que pronunciará Núñez Sabarís. De seguido, Rosario Mascato protagonizará outra intervención baixo o epígrafe ‘Ramón del Valle-Inclán e a súa época (1886-1936): unha unidade didáctica interdisciplinar con materiais dixitais para ELE.

Os recursos didácticos para traballar a obra de Valle-Inclán nas aulas de ensino secundario, do simbolismo ao esperpento, centrarán o relatorio da profesora Cristina Villarmea, que pechará coa súa intervención o seminario ‘Valle-Inclán na aula’.