A USC, cuarta en produtividade no Ránking 2019 de investigación das universidades públicas españolas
O Ránking 2019 que mide a produción e a produtividade das universidades públicas españolas en materia de investigación sitúa á USC no posto número catro en produtividade científica, só por detrás da Pompeu Fabra, Autónoma de Madrid e Autónoma de Barcelona. Esta clasificación foi elaborada por investigadores do Centro de Investigación Mente, Cerebro e Comportamento da Universidade de Granada.
O obxectivo deste estudo é actualizar a última clasificación dispoñible de investigación das universidades públicas españolas cos datos de 2013-2018. Neste senso, avaliouse a produción e produtividade de cada universidade, atendendo a sete indicadores específicos e a unha puntuación global: artigos en revistas indexadas no JCR (Journal Citation Reports), tramos de investigación, proxectos I+D, teses doutorais, axudas FPU (formación de profesorado universitario), axudas FPI (formación de persoal investigador) e patentes. Asemade, para obter en cada universidade os datos de produtividade de cada indicador, dividíronse os datos brutos de produción de cada un dos sete criterios polo número de profesores doutores de cada institución.
Alén de ocupar o cuarto posto en materia de produtividade global, a USC é segunda en tramos de investigación a nivel estatal e cuarta, en axudas FPI. Ademais, a de Santiago ocupa a quinta posición en proxectos de I+D e bolsas FPU. A Universidade tamén é décima no indicador relativo aos artigos en revistas indexadas no JCR.
Produción
No relativo aos datos específicos de produción, isto é, sen ter en conta o número de profesores doutores de cada universidade, a USC ocupa o noveno posto da clasificación global. Na división por indicadores, a Universidade é a oitava de España en proxectos de I+D e en axudas FPI; novena en axudas FPU; décimo primeira en tramos de investigación; décimo terceira en artigos en revistas JCR e patentes; así como décimo sexta, en teses de doutoramento.
Best Global Universities
Ademais desta clasificación sobre as universidades públicas españolas, o ránking ‘Best Global Universities’ sitúa á USC entre as mellores dez universidades españolas e no posto 203 de entre as máis de catrocentas institucións europeas analizadas.
Para a elaboración desta listaxe valorouse a reputación da investigación a nivel global (12,5%) e a nivel rexional (12,5%), publicacións (10%), libros (2,5%), conferencias (2,5%), impacto de citas normalizado (10%), total de citas (7,5%), número de publicacións que se encontran entre o 10% máis citado (12.5%), porcentaxe do total de publicacións que se encontran entre o 10% máis citado (10%), proporción de traballos totais da institución que conteñen coautores internacionais divididos pola proporción de artigos con coautores internacionais para o país no que se atopa a universidade (5%), proporción de artigos totais da institución que conteñen coautores internacionais (5%), número de artigos altamente citados que se atopan entre o 1% máis citado no seu respectivo campo (5%), e a porcentaxe das publicacións totais que figuran entre o 1% máis destacados (5%).