O VII Congreso Internacional sobre Emprendemento Universitario analizará en santiago os spin-offs académicos

A Universidade de Santiago organiza a sétima edición do Congreso Internacional sobre Emprendemento Universitario que terá lugar os días 28 e 29 de xuño na Facultade de Dereito dedicado nesta ocasión ao estudo dos spin-offs académicos, empresas de base tecnolóxica xurdidas da actividade universitaria.
A capacidade das empresas para innovar é un dos factores que contribúen, en maior medida, á competitividade e ao crecemento a longo prazo polo que os organizadores consideran necesario difundir entre as empresas unha cultura que lles permita beneficiarse das novas oportunidades derivadas dos cambios tecnolóxicos así como artellar medidas de apoio para o financiamento da innovación.
O congreso ofrecerá aos participantes a oportunidade de discutir e intercambiar pareceres no terreo do emprendemento universitario, profundando nas experiencias das Universidades de Cambridge e Oxford na creación de spin-off, explicando o novo marco xurídico destes e o acceso ao financiamento para Star-Ups innovadores ou exemplos de spin-off de éxito como Algenex, Crioestaminal ou Nanogap, esta última da Universidade de Santiago.
No encontro participarán representantes de entidades financeiras, administracións públicas, autonómicas, estatais e europeas, así como de universidades da Unión Europea e membros da comunidade universitaria compostelá.