Vinte e dous estudantes europeos e americanos participan na USC no seminario anual de doutoramento do Hermes Consortium for Literary & Cultural Studies

A Universidade de Santiago, a través da área de Teoría da Literatura e Literatura Comparada, vai acoller entre os días 22 e 26 o seminario anual de doutoramento do Hermes Consortium for Literary & Cultural Studies.
Organizado polo profesor César Domínguez, o seminario acollerá a vinte e dous estudantes europeos e estadounidenses escollidos en selección competitiva polas nove universidades membro, que presentarán traballos asociados ás súas teses de doutoramento relacionados co tema ‘Contemporary Developments in Emergent Literatures and the New Europe’. Ademais, o mércores 24 celebrarase un simposio internacional no que intervirán os profesores William Rowe (Birbeck College), Manuela Palacios (USC), Ansgar Nünning (Justus-Liebig-Universität Giessen), Julián Jiménez Heffernan (Universidad de Córdoba) e Søren Frank (Syddansk Universitet).
O Hermes Consortium for Literary & Cultural Studies intégrano, ademais da USC, outros oito centros universitarios, como son o Centro de Estudos Comparatistas da Universidade de Lisboa; a Facultade de Letras da Katholieke Universiteit Leuven; a Facultade de Artes e Humanidades da University College London; Giessener Graduiertenzentrum der Kulturwissenschaften da Justus-Liebig-Universität Giessen; a Facultade de Humanidades da Aarhus Universitet; Onderzoekschool Literatuurwetenschap da Universiteit Utrecht; a Universidade de Stanford; e a Universidade de Wisconsin-Madison.
O obxectivo do Hermes Consortium é promover o estudo da presenza europea na literatura, as artes e a cultura na era da globalización e promover a análise interdisciplinar nos estudos literarios e culturais.