Segunda xornada do Foro de reflexión e debate ‘Ler o mundo hoxe...’
Co obxecto de fomentar as prácticas lectoras no seo da comunidade universitaria e na sociedade en xeral, o grupo de investigación en Pedagoxía Social e Educación Ambiental da USC (SEPA_Interea) organiza o Foro de reflexión e debate ‘Ler o mundo hoxe...’ que este mércores 28 acomete a súa segunda sesión dedicada a analizar a relación entre os tempos educativos e sociais. Esta é unha iniciativa que, nas distintas sesións programadas ata finais de ano, proporá diversos debates en relación a cuestións como educación, xénero, perspectiva cidadá ou medio ambiente. SEPA_Interea está recoñecido como grupo de referencia competitiva do Sistema Universitario Galego e está coordinado polo profesor José Antonio Caride.
O Foro conta coa colaboración e co financiamento do Consello Social da USC, a Rede Internacional de Universidades Lectoras (RIUL), a Rede de Investigación en Educación e Formación para a Cidadanía e a Sociedade do Coñecemento (RINEF-CISOC), así como do Fondo Europeo de Desenvolvemento Rexional (FEDER). O Foro ten como principal obxectivo “promover e desenvolver unha proposta formativa que –tendo a lectura como eixo central– posibilite miradas e interpretacións plurais sobre as realidades socioambientais no local-global, que fortalezan o compromiso cívico e democrático da comunidade universitaria e dos seus vínculos coa sociedade que a contorna”.
No programa do próximo mércores 28, no Auditorio da Facultade de Filoloxía, o Foro comezará ás 16.30 horas coa conferencia ‘A lectura como ocio e recreación’, do escritor Domingo Villar, e proseguirá cunha sesión de poesía musicada que interpretarán Uxía Senlle e Sérgio Tannus co lema ‘ Outros modos de darse á lectura e á escritura’. Xa o día 5 de outubro o foro recalará no Centro Sociocultural de Santa Marta. Todas as actividades son abertas a gratuítas ata completar o aforo, agás a charla obradoiro deste mércores que ten un límite de 50 prazas polo que se respectará a orde de inscrición.
Ao longo do mes de outubro as actividades de ‘Ler o mundo hoxe...’ desenvolveranse en clave de equidade de xénero (días 19 e 26 de outubro), mentres que en novembro será dende a perspectiva da cidadanía e participación (días, 3, 9 e 16) e en decembro en clave de sustentabilidade ambiental: (días 1 e 14).
O foro
A proposta integra catro lecturas do mundo dende unha perspectiva multidisciplinar e tres actividades transversais. As lecturas converxen con catro das liñas de investigación do grupo: os tempos educativos e sociais, a equidade de xénero, a construción da cidadanía nos procesos de participación social e a sustentabilidade ambiental. Pola súa banda, as actividades transversais concrétanse nun concurso de microrrelatos, un concurso de ideas para fomentar o hábito lector na Universidade, así como na celebración do Día Internacional da Lectura Universitaria que celebra a Rede Internacional de Universidades Lectoras (RIUL), da que a USC forma parte, e que coincide co 29 de abril de 2017.
Na web do grupo http://www.usc.es/gl/investigacion/grupos/sepa_interea/ e no facebook https://es-la.facebook.com/sepa.interea/ pódese consultar o programa desta iniciativa, a desenvolver entre os meses de setembro de 2016 e maio de 2017, en diferentes espazos e equipamentos de Compostela, Lugo e Rianxo para compartir coloquios, diálogos, música, teatro e literatura nas súas diferentes modalidades (narrativa, poesía, ensaio, ...). O equipo de coordinación deste Foro está integrado polos profesores da USC José Antonio Caride, Belén Caballo, Rita Gradaílle, Pablo Meira e Laura Varela, aos que se engade o profesor Héctor Pose, da Universidade da Coruña, membro da Comisión Directiva da RIUL en representación das Universidades galegas.