Zendal reforza a súa aposta polo benestar animal coa participación na empresa emerxente do Campus Terra Innogando

O grupo Zendal reforza a súa aposta pola saúde e o benestar animal coa súa participación na empresa emerxente do Campus Terra da USC, unha empresa liderada polo veterinario cospeités Elio López que destinará esta nova achega de capital á co creación de dispositivos Rumi, tal e como se coñece o sistema de localización GPS para gando que monitorea en tempo real o estado do animal e recompila toda a información nunha App para que o usuario poida acceder a ela cando o necesite.

A aposta de Zendal por Innogando e nomeadamente polo xeolocalizador Rumi, un dispositivo acaído para mellorar o benestar e tamén a produtividade do gando, constitúe un novo impulso para a start up galega Innogando, destacada no Ranking das Mellores 100 Startups de España 2021 polo seu labor nos campos da tecnoloxía aplicada ao sector gandeiro e a mobilidade

Alén desta primeira achega económica, cuxa contía podería verse incrementada nos vindeiros meses, segundo se desprende das negociacións que manteñen abertas Zendal e Innogando, a colaboración non se circunscribe unicamente a cuestións de financiamento, dado que o grupo do sector biofarmacéutico tamén ofrece a súa colaboración coa súa rede de distribución para a expansión de Rumi.

A participación en Innogando encádrase no proxecto ideado por Zendal para colaborar  con empresas emerxentes e confirma a aposta da biotecnológica con sede en Porriño pola co innovación e a transformación dixital no mundo da saúde e benestar. “O apoio a Innogando reflicte o noso compromiso coa investigación e o desenvolvemento nas áreas de saúde humana e animal, cun obxectivo final que é a mellora da calidade de vida e do benestar”, subliña o CEO de Zendal, Andrés Fernandez.

Mellorar a produtividade do gando

O proxecto de Innogando agromou no Campus de Lugo coa idea de dar resposta a unha demanda de dixitalización do sector gandeiro. Neste caso, para mellorar a calidade de vida dos profesionais a través da tecnoloxización de moitos sistemas e ao mesmo tempo ampliar a rendibilidade da súa granxa e reforzar o benestar animal.

A boa acollida rexistrada por Rumi, un dos desenvolvementos tecnolóxicos máis destacados de Innogando, permitiu un crecemento rápido da compañía que conta xa con dez traballadores, rexistra vendas a nivel nacional e, co respaldo do grupo Zendal, confía en poder dar o salto á venda internacional, xa que “neste tempo comprobamos a necesidade deste tipo de servizos e doutros nos que xa estamos a traballar”, destaca o CEO de Innogando, Elio López.

Innogando

Innogando nace en 2020 como un proxecto que une tecnoloxía e natureza a prol da dixitalización do sector gandeiro e co obxectivo de mellorar a calidade de vida dos profesionais, a rendibilidade das explotacións gandeiras e o benestar animal. Con sede en Lugo, Innogando está integrada por un variado capital humano, do que forman parte gandeiros, veterinarios, enxeñeiros informáticos e electrónicos. O grupo Zendal, Xesgalicia e Vigo Activo apoian este proxecto.