Master Universitario de Arqueoloxía e Ciencias da Antigüidade

En termos xerais, os grupos de interese a que se destina o título son persoas coa intención de desenvolver estudos sobre arqueoloxía, o mundo clásico ou a prehistoria (en xeral, ou especificamente da Gallaecia), con certas aptitudes lingüísticas tanto para leren textos noutras linguas como para se expresaren na súa propia, e un certo coñecemento xeral do proceso histórico. En concreto, o perfil de acceso estará aberto a licenciados ou graduados de todas as ramas de coñecemento porque a experiencia dinos que pode haber interese tamén pola arqueoloxía/historia desde ámbitos científicos (químicos, edafólogos, etc.), cuxa formación previa resulta moi útil para os estudos do mestrado. Inclusive os alumnos procedentes do grao en Historia teñen unha escasa formación en arqueoloxía/prehistoria/historia antiga, de modo que consideramos que debemos manter o perfil xeral.

Condicións de terminación:

Obrigatorias: 21
Optativas: 24
Prácticas externas OB 6
Traballo fin de máster: 9
Total: 60

A comisión académica designa un titor para cada 3 alumnos. O titor oferece asesoramento académico en canto ás opcións e a orientación do proxecto académico e profesional, apoio na identificación e mellora en aspectos da formación dos estudantes que o requiran así como para a elección de tema e titor de TFM.

Ademais da xornada de inauguración, o apoio e orientación aos estudantes canalízase por dúas vías: por unha banda, cada ano, desígnanse dous representantes -normalmente, a finais de setembro xa se produciu a súa designación-, que forman parte da comisión académica, de maneira que poden obter toda a información e canalizaren todas as queixas ou dificultades que vaian xurdindo.

Así mesmo, as universidades poñen a disposición do estudantado información sobre o seu funcionamento, sobre os aspectos administrativos, académicos, de xestión e de participación nas estruturas de goberno.

Os servizos con que conta cada unha das universidades son os que se detallan a continuación: A USC, dentro de todos os servizos a disposición da comunidade universitaria. conta cos seguintes directamente relacionados cos servizos de apoio ao alumnado:

-Área de Cultura
-Área de Orientación Laboral e Emprego
-Área de Tecnoloxías da Información e das Comunicacións (ATIC)
-Gabinete de Comunicación
-Oficina de Igualdade de Xénero
-Servizo de Normalización Lingüística
-Servizo de Participación e Integración Universitaria
-Servizo de Relacións Exteriores (SRE)
-Oficina de Información Universitaria: é o servizo que a universidade pon a disposición da comunidade universitaria e das persoas alleas á mesma, coa finalidade de canalizar e dar resposta ás demandas informativas sobre a súa organización, funcionamento e actividades. Con carácter xeral, informa sobre trámites e xestións dos procedementos académicos e de extensión universitaria e colabora na súa difusión, tanto no contorno máis inmediato como organizando ou participando en feiras e eventos de carácter educativo.

Cando se produza a suspensión dun título oficial, a USC garante o adecuado desenvolvemento efectivo das ensinanzas que iniciasen os seus estudantes ata a súa finalización. Para iso, o Consello de Goberno aproba os criterios relacionados, entre outros, con:

• A admisión de matrículas de novo ingreso na titulación.
• A supresión gradual da impartición da docencia.
• Se o título extinguido é substituído por outro similar (modificando a natureza do título), fixa as condicións que faciliten aos/as estudantes a continuidade de estudos no novo título e as equivalencias entre as materias dun e doutro plan.

Acceso

Poderán acceder ás ensinanzas oficiais de máster:
1. As persoas que estean en posesión dun título universitario oficial español.
2. Aquelas que teñan un título expedido por unha institución de educación superior do EEES que faculta no país expedidor do título para o acceso a ensinanzas de máster.
3. Os titulados conforme a sistemas educativos alleos ao EEES sen necesidade de homologación dos seus títulos, previa comprobación pola Universidade de que os ditos títulos acreditan un nivel de formación equivalente aos correspondentes títulos universitarios españois e que facultan no país expedidor do título para o acceso a ensinanzas de posgrao.

Admisión

Modalidade: con límite de prazas e criterios xerais

Titulacións por orde de preferencia:

1º) Graduados ou licenciados en Historia, Xeografía e Historia, e Historia da Arte.
2º) Resto de titulacións universitarias

As prazas vacantes en calquera das tres universidades poden ser asignadas polas dúas restantes.

Información actualizada en cada convocatoria de matrícula

-Posuír e comprender coñecementos que acheguen unha base ou oportunidade de seren orixinais no desenvolvemento e/ou aplicación de ideas, a miúdo nun contexto de investigación.
-Que os estudantes saiban aplicar os coñecementos adquiridos e a súa capacidade de resolución de problemas en contornos novos ou pouco coñecidos dentro de contextos máis amplos (ou multidisciplinares) relacionados coa súa área de estudo.
-Que os estudantes sexan capaces de integrar coñecementos e enfrontarense á complexidade de formular xuízos a partir dunha información que, sendo incompleta ou limitada, inclúa reflexións sobre as responsabilidades sociais e éticas vinculadas á aplicación dos seus coñecementos e xuízos.
-Que os estudantes saiban comunicar as súas conclusións (e os coñecementos e razóns últimas que as sustentan) a públicos especializados e non especializados dun modo claro e sen ambigüidades.
-Que os estudantes posúan as habilidades de aprendizaxe que lles permitan continuar estudando dun modo que haberá de ser en grande medida autodirixido ou autónomo.

-Que os estudantes demostren unha comprensión sistemática dun campo de estudo e o dominio das habilidades e métodos de investigación relacionados con devandito campo.
-Que os estudantes demostren a capacidade de concibir, deseñar, poñer en práctica e adoptar un proceso substancial de investigación con seriedade académica.
-Que os estudantes realicen unha contribución a través dunha investigación orixinal que amplíe as fronteiras do coñecemento desenvolvendo un corpus substancial, do que parte mereza a publicación referenciada a nivel nacional ou internacional.
-Que os estudantes sexan capaces de realizar unha análise crítica, avaliación e síntese de ideas novas e complexas.
-Que os estudantes saiban comunicarse cos seus colegas, coa comunidade académica no seu conxunto e coa sociedade en xeral sobre as súas áreas de coñecemento.
-Que se lles supoña capaces de fomentar, en contextos académicos e profesionais, o avance tecnolóxico, social ou cultural dentro dunha sociedade baseada no coñecemento.
-Que os estudantes demostren ao longo da investigación capacidade para establecer relacións mutuas entre os tres eixes principais que configuran o programa: histórico, arqueolóxico-artístico e lingüístico-literario.
-Que sexan capaces de relacionar a cultura clásica coa doutros períodos históricos.
-Que sexan capaces de abrir vías de especialización novedosas no ámbito dos estudos arqueolóxicos.
-Que a súa formación avanzada contribúa ao desenvolvemento cultural europeo a través da correcta transmisión e interpretación crítica do patrimonio histórico e cultural do mundo clásico.

-Ser capaz de colaborar na xestión de coleccións e museos.
-Ser capaz de levar a cabo tarefas de colaboración e de asesoramento en plans directores, plans especiais, traballos arqueolóxicos, etc.
-Ser capaz de participar activamente na organización de tarefas de xestión cultural.
-Adquirir as capacidades necesarias para dirixir actividades de campo, de prospección e de excavación arqueolóxica e de tratamento e estudo de materiais e mostras.
-Ser capaz de preparar e redactar informes históricos e arqueolóxicos, adaptándose ao tipo de actividade que se desenvolva.

-Utilizar bibliografía e ferramentas de procura de recursos bibliográficos xerais e específicos, que inclúe o acceso por Internet, vendo as súas enormes posibilidades e potenciando a capacidade discriminatoria do alumno sobre os seus contidos.
-Xestionar de forma óptima o tempo de traballo e organizar os recursos dispoñíbeis, estabelecendo prioridades, camiños alternativos e identificando erros na toma de decisións.
-Potenciar a capacidade de traballo en equipo, en contornos cooperativos, pluridisciplinares ou de alto nivel competitivo.