A Facultade de Humanidades de Lugo elabora un vídeo para a dar a coñecer as súas titulacións

O mércores 23 durante todo o día levouse a cabo a rodaxe das entrevistas para a elaboración dun vídeo promocional da Facultade de Humanidades do Campus de Lugo. A gravación, que realizaron os técnicos do Servizo de Medios Audiovisuais da USC (Servimav), ten como obxectivo mostrar o valor engadido e as vantaxes de estudar as titulacións que se imparten neste centro (Grao en Ciencias da Cultura e Difusión Cultural, Grao en Lingua e Literatura Españolas e Máster de Servizos Culturais), así como informar sobre as saídas laborais que proporcionan cada unha delas. No vídeo participan alumnos actuais do centro e outros que xa remataron os seus estudos, docentes da Facultade (Claudio Rodríguez Fer, Gonzalo Fernández Suárez, JoDee Anderson) e especialistas en diversos ámbitos da difusión e a xestión cultural: a técnica do Arquivo Histórico Provincial Dolores Pereira; a técnica do Centro de Artesanía e Deseño da Deputación Provincial Margarita López; o director do Museo Arqueolóxico do Castro de Viladonga, Felipe Arias; e a escritora Marica Campos. A peza terá unha duración aproximada de cinco minutos e estará rematada cara a mediados do mes de xuño. A idea é adaptar a gravación aos diferentes formatos que permitan a súa difusión, entre outros espazos, na páxina web da facultade, nas redes sociais, nos medios de comunicación, así como nos centros de secundaria.