RENFE ofrece descontos nos seus traxectos de media distancia aos estudantes Erasmus e de Iberoamérica

O reitor da Universidade de Santiago, Senén Barro, e o xerente da Dirección de Media Distancia Convencional de RENFE para o Noroeste, Carlos de Abajo, asinaron en San Xerome un convenio de colaboración para ofrecerlle vantaxes no transporte en tren aos estudantes Erasmus e de Iberoamérica matriculados na USC.
Deste xeito, a estes estudantes facilitaráselles unha tarxeta gratuíta de mobilidade estudantil coa que se lles aplicará un desconto do 20% nos traxectos por Galicia nos trens de RENFE Operadora Media Distancia así como nalgúns que teñan a súa orixe ou destino nalgún punto da xeografía galega, como pode ser León.
Destas vantaxes beneficiaranse preto de mil douscentos estudantes matriculados na USC, nos campus de Santiago e Lugo, que poderán así visitar todos os lugares de Galicia cunha rebaixa importante no prezo.
Ao acto de sinatura asistiron os vicerreitores de Relacións Institucionais e de Comunidade Universitaria e Compromiso Social, Lourenzo Fernández e José M. Mayán, respectivamente, así como o xefe comercial da Dirección de Media Distancia Convencional de RENFE para o Noroeste, Ángel Meilán Parga.