Programa de Doutoramento en Análise Económica e Estratexia Empresarial

Con carácter xeral, serán admitidos no Programa de Doutoramento en Economía e Empresa, aqueles alumnos que cursasen con bo rendemento académico un programa de máster en Economía e/ou Empresa que familiarice ao estudante cos principais paradigmas teóricos e cos métodos de análise empírica da súa especialización. Máis concretamente, por bo rendemento académico enténdese que obtivese unha cualificación media de notable nos seus estudos previos. Por suficiente formación teórica e empírica entendemos, con carácter xeral, que teña acreditado un curso de econometría (6 créditos) e microeconomía (6 créditos) ou finanzas (6 créditos) e economía da empresa (6 créditos) de nivel avanzado. Ademais, poderán ser admitidos no Programa de Doutoramento en Economía e Empresa estudantes procedentes doutros programas de máster que, a xuízo da CAPD, capaciten ao alumno para abordar con éxito o Programa. Exemplo desta situación poden ser estudantes procedentes de programas de máster en enxeñaría, matemáticas ou estatística.

No caso de que o alumnado careza da formación previa completa esixida no programa, a admisión quedará condicionada á superación de complementos de formación específicos. A Comisión Académica do Programa de Doutoramento determinará en cada caso os complementos formativos que haberá de cursar cada estudante, que como máximo non superarán 15 ECTS.

Os complementos de formación concretaranse en materias de grao (Economía ou Administración e Dirección de Empresas, segundo o caso) ou, preferentemente, dun programa de máster que dependerá do perfil do estudante. Estas materias serán econometría (6 créditos) e microeconomía (6 créditos) ou finanzas (6 créditos) e economía da empresa (6 créditos) de nivel avanzado Para aqueles estudantes provenientes dun máster do ámbito científico ou tecnolóxico os complementos formativos centraranse, tamén dependendo de cada caso, en materias introdutorias de economía: Microeconomía (6 créditos), macroeconomía (6 créditos) e técnicas econométricas (3 créditos) ou introdución á economía da empresa (6 créditos), introdución ás finanzas (6 créditos) e técnicas econométricas (3 créditos).

Acceso

1. Con carácter xeral, para o acceso a un programa oficial de doutoramento será necesario estar en posesión dos títulos oficiais españois de Grao, ou equivalente, e de Máster universitario, ou equivalente, sempre que se teñan cursado, polo menos, 300 créditos ECTS no conxunto destas dúas ensinanzas.

2. Así mesmo, poderá acceder quen se atope nalgún dos seguintes supostos:

a) Estar en posesión dun título universitario oficial español ou doutro país integrante do Espazo Europeo de Educación Superior, que habilite para o acceso ao máster de acordo co establecido no artigo 16 do RD 1393/2007, e superar un mínimo de 300 créditos ECTS no conxunto de estudos universitarios oficiais, dos cales polo menos 60 deberán ser de nivel de máster.

b) Estar en posesión dun título oficial español de graduado ou graduada, cuxa duración, conforme normas de dereito comunitario, sexa de polo menos 300 créditos ECTS. Ditos titulados deberán cursar con carácter obrigatorio os complementos de formación requiridos polo programa, agás que o plan de estudos do correspondente título de grao inclúa créditos de formación en investigación equivalentes en valor formativo aos créditos en investigación procedentes de estudos de máster.

c) Os titulados universitarios que, logo da obteren praza en formación na correspondente proba de acceso a prazas de formación sanitaria especializada, superen con avaliación positiva polo menos dous anos de formación dun programa para a obtención do título oficial dalgunha das especialidades en ciencias da saúde.

d) Estar en posesión dun título obtido conforme sistemas educativos estranxeiros, sen necesidade da súa homologación, logo da comprobación pola Universidade de que este acredita un nivel de formación equivalente á do título oficial español de máster universitario e que faculta no país expedidor do título para o acceso a estudos de doutoramento. Esta admisión non implicará, en ningún caso, a homologación do título previo do cal estea en posesión o interesado nin o seu recoñecemento para outros efectos que o do acceso a ensinos de doutoramento.

e) Estar en posesión doutro título español de doutor obtido conforme anteriores ordenacións universitarias.

f) Estar en posesión dun título universitario oficial que obtivera a correspondencia ao nivel 3 do Marco Español de Cualificacións para a Educación Superior, de acordo co procedemento establecido no Real Decreto 967/2014, de 21 de novembro, polo que se establecen os requisitos e o procedemento para a homologación e declaración de equivalencia a titulación e a nivel académico universitario oficial e para a validación de estudos estranxeiros de Educación Superior, e o procedemento para determinar a correspondencia aos niveis do Marco Español de Cualificacións para a Educación Superior dos títulos oficiais de Arquitecto, Enxeñeiro, Licenciado, Arquitecto Técnico, Enxeñeiro Técnico e Diplomado.

3. Os doutorandos que iniciasen o seu programa de doutoramento conforme anteriores ordenacións universitarias poderán acceder ao ensino de doutoramento, logo da súa admisión de acordo co establecido no Regulamento de estudos de doutoramento da USC. En todo caso deberán reunir os requisitos establecidos con carácter xeral no citado Regulamento para acceder aos estudos de doutoramento.

4. Poderán acceder aos estudos de doutoramento os licenciados, arquitectos ou enxeñeiros que posúan o diploma de estudos avanzados obtido de acordo co disposto no Real decreto 778/1998, do 30 de abril, ou alcancen a suficiencia investigadora regulada no Real decreto 185/1985, do 23 de xaneiro.

5. Poderán acceder aos estudos de doutoramento os licenciados, arquitectos ou enxeñeiros que posúan un título de máster oficial conforme o Real decreto 56/2005 ou o Real decreto 1393/2007, modificado polo Real decreto 861/2010, ou teñan superados 60 ECTS de estudos de máster oficial.

6. Tamén poderán acceder os diplomados, enxeñeiros técnicos ou arquitectos técnicos que acrediten ter 300 créditos ECTS superados no conxunto de estudos universitarios oficiais, dos cales, polo menos 60, deberán ser de nivel de máster.

No Programa Interuniversitario de Doutoramento en Análise Económica e Estratexia Empresarial, os criterios de selección basearanse fundamentalmente no expediente académico. Tamén se terá en conta o curriculum vitae do estudante. Será relevante para a decisión sobre a admisión no Programa unha entrevista coa candidata ou candidato na que se porán de relevo a súa capacidade para expresarse en lingua inglesa e a súa información sobre o que implica un programa de doutoramento e a súa disposición para abordalo.

Valórase moi positivamente que o estudante que solicita a admisión no programa xa contactase previamente á solicitude de admisión cun posible director de tese e que este aceptase dirixirlla.

O programa de doutoramento poderá extinguirse por algunha das seguintes causas:

• Que non supere o proceso de renovación da acreditación establecido no artigo 10 do RD 99/2011.

• Que non acredite o cumprimento dos requisitos establecidos pola normativa estatal ou autonómica vixente.

• Que se formule unha proposta de extinción do programa ao abeiro dos procesos de revisión e mellora do título de acordo co procedemento aprobado pola universidade.

• Que concorra calquera situación excepcional que impida o correcto desenvolvemento do programa de doutoramento.

A extinción producirá os seguintes efectos:

• Comportará a perda do seu carácter oficial e a baixa no RUCT.

• Non se poderá matricular novo alumnado no programa de doutoramento.

• En calquera caso todo o alumnado afectado deberá ser informado da extinción e das consecuencias desta no relativo ao desenvolvemento dos seus estudos.

A Universidade adoptará as medidas necesarias para garantir os dereitos académicos do alumnado que estea cursando os ditos estudos nos termos establecidos na resolución de extinción do plan de estudo, e aprobará o procedemento de extinción dos programas de doutoramento no seo da universidade.

• Comprensión sistemática dun campo de estudo e dominio das habilidades e métodos de investigación relacionados co devandito campo

• Capacidade de concibir, deseñar ou crear, pór en práctica e adoptar un proceso substancial de investigación ou creación

• Capacidade para contribuír á ampliación das fronteiras do coñecemento a través dunha investigación orixinal

• Capacidade de realizar unha análise crítica e de avaliación e síntese de ideas novas e complexas

• Capacidade de comunicación coa comunidade académica e científica e coa sociedade en xeral acerca dos seus ámbitos de coñecemento nos modos e idiomas de uso habitual na súa comunidade científica internacional

• Capacidade de fomentar, en contextos académicos e profesionais, o avance científico, tecnolóxico, social, artístico ou cultural dentro dunha sociedade baseada no coñecemento.

1. Coñecemento dos métodos e técnicas econométricas necesarios para analizar e para obter información contrastable dos datos económicos empíricos.

2. Coñecemento profundo dos modelos teóricos e a súa aplicación a situacións económicas concretas.

1. Coñecemento dos métodos e técnicas econométricas necesarios para analizar e para obter información contrastable dos datos económicos empíricos.

2. Coñecemento profundo dos modelos teóricos e a súa aplicación a situacións económicas concretas.