Programa de Doutoramento en Marketing Político, Actores e Institucións nas Sociedades Contemporáneas

Sen complementos de formación:

- De forma xeral, poderán acceder a este programa de doutoramento, alumnos/as graduados en Ciencia Política, Xornalismo e Comunicación Audiovisual, Económicas, Administración e Dirección de Empresas, Publicidade e Relacións Públicas, Xestión e Administración Pública ou Dereito, con título de Máster en Marketing Político, Comunicación Política, Goberno Local e Políticas Públicas ou similares.

- Tamén terán acceso ao programa os estudantes co título de DEA obtido a través do Programa de doutoramento Procesos Políticos Contemporáneos na USC ou similares.

Outros perfís:

- No caso de outros perfís que non realizasen máster necesitarase unha equivalencia de formación en créditos de investigación, iguais polo menos aos do máster que dá acceso directo, que serán 9 ECTS.

- Para calquera outro perfil a CAPD estudará os casos individualmente, podendo admitir ou non aos/as alumnos/as e establecendo complementos de formación en caso de ser necesario. Estes complementos non poderán superar os 15 ECTS.

Acceso

1. Con carácter xeral, para o acceso a un programa de doutoramento será necesario estar en posesión dos títulos españois de grao, ou equivalente, e de máster universitario.

2. Así mesmo, poderá acceder quen se atope nalgún dos seguintes supostos:

a) Estar en posesión dun título universitario español ou doutro país integrante do Espazo Europeo de Educación Superior que habilite para o acceso ao máster, de acordo con o establecido no artigo 18 do R.D. 822/2021, e superar un mínimo de 300 créditos ECTS no conxunto de estudos universitarios, dos que, polo menos 60, haberán de ser de nivel de Máster.

b) Estar en posesión dun título español de graduado ou graduada, cuxa duración, conforme a normas de dereito comunitario, sexa de polo menos 300 créditos ECTS. Os devanditos titulados deberán cursar con carácter obrigatorio os complementos de formación requiridos polo programa, agás que o plan de estudos do correspondente título de grao inclúa créditos de formación en investigación equivalentes en valor formativo aos créditos en investigación procedentes de estudos de máster.

c) Os titulados universitarios que, previa obtención de praza en formación na correspondente proba de acceso a prazas de formación sanitaria especializada, superen con avaliación positiva polo menos dous anos de formación dun programa para a obtención do título dalgunha das especialidades en Ciencias da Saúde.

d) Estar en posesión dun título obtido conforme a sistemas educativos estranxeiros, sen necesidade da súa homologación, previa comprobación pola universidade de que este acredita un nivel de formación equivalente ao do título español de máster universitario e que faculta no país expedidor do título para o acceso aos estudos de doutoramento. Esta admisión non implicará, en ningún caso, a homologación do título previo do que estea en posesión o interesado nin o seu recoñecemento a outros efectos que o do acceso a ensinos de doutoramento.

e) Estar en posesión doutro título español de doutor obtido conforme ás anteriores ordenacións universitarias.

f) Estar en posesión dun título universitario que obtivese a correspondencia ao nivel 3 do Marco Español de Cualificacións para a Educación Superior, de acordo co procedemento establecido no Real Decreto 967/2014, do 21 de novembro, polo que se establecen os requisitos e o procedemento para a homologación e declaración de equivalencia a titulación e a nivel académico universitario oficial e para a validación de estudos estranxeiros de Educación Superior, e o procedemento para determinar a correspondencia aos niveis do Marco Español de Cualificacións para a Educación Superior dos títulos de Arquitecto, Enxeñeiro, Licenciado, Arquitecto Técnico, Enxeñeiro Técnico e Diplomado.

3. Os doutorandos que iniciasen o seu programa de doutoramento conforme a anteriores ordenacións universitarias poderán acceder ao ensino de doutoramento previa admisión, de acordo co establecido no Regulamento de Estudos de Doutoramento da USC. En todo caso deberán reunir os requisitos establecidos con carácter xeral na devandita lexislación para acceso a estudos de doutoramento.

4. Poderán acceder aos estudos de doutoramento os licenciados, arquitectos ou enxeñeiros que estivesen en posesión do Diploma de Estudos Avanzados obtido de acordo con o disposto no Real Decreto 778/1998, do 30 de abril, ou alcanzasen a suficiencia investigadora regulada no Real Decreto 185/1985, do 23 de xaneiro.

5. Poderán acceder aos estudos de doutoramento os licenciados, arquitectos ou enxeñeiros que estivesen en posesión dun título de máster conforme ao Real Decreto 56/2005 ou do Real Decreto 822/2021, ou superasen 60 ECTS de estudos de máster.

6. Tamén poderán acceder os diplomados, enxeñeiros ou arquitectos técnicos que acrediten ter 300 créditos ECTS no conxunto de estudos universitarios, dos que polo menos 60 haberán de ser de nivel de máster.

No caso de que o/a alumno/a proceda de sistemas educativos onde a lingua materna non sexa o castelán, o galego, o portugués ou o inglés, e dadas as características e o nivel científico do programa de doutoramento, a CAPD asegurarase de que o/a alumno/a teña acreditado o nivel de coñecemento dun dos idiomas de impartición do programa equivalente ao nivel C1 segundo o Marco Común Europeo de Referencia (MCER). O nivel de coñecemento do idioma acreditarase coa correspondente certificación oficial das incluídas na listaxe de acreditacións recoñecidas polo Centro de Linguas Modernas (CLM) da USC para os distintos niveis do Marco Común Europeo.

No caso de que o número de preseleccionados exceda o número de prazas de novo ingreso ofertadas para estudantes en réxime de tempo completo, a CAPD procederá á súa admisión de acordo con os seguintes criterios citados por orde de prevalencia:

1. Os titulados nun máster ou graduados/licenciados en titulacións das ramas de coñecemento: a) Ciencia política e Relacións internacionais, Ciencias sociais, Traballo social, Relacións laborais e Recursos humanos, Socioloxía; b) Xornalismo, Comunicación, Publicidade e Relacións públicas; c) Estudos de xénero e Estudos feministas; d) Historia, Arqueoloxía, Xeografía, Filosofía e Humanidades (RD 822/2021).

2. Os graduados/licenciados en disciplinas académicas vinculadas á Ciencia Política e da Administración. Baixo a denominación “Ciencias vinculadas á Ciencia Política e Administración ou Xestión Pública” intégranse indistintamente todas aquelas con presenza nos plans de estudo dos títulos de Grao en Ciencia Política e Xestión Pública das universidades españolas ou estranxeiras.

3. A CAPD terá en consideración, complementariamente, para a selección de estudantes para a súa admisión no programa, os seguintes criterios:

a. Expediente académico. Non poderá exceder do 50% da valoración total.
b. Avaliación do currículo académico. Non poderá exceder do 50% da valoración total.

No caso de que houbera varios candidatos/as sobre vos que non puidese establecerse ningún criterio de diferenciación, valorarase a preparación e motivación do estudante.

O programa de doutoramento poderá extinguirse por algunha das seguintes causas:

• Que non supere o proceso de renovación da acreditación establecido no artigo 10 do RD 99/2011.

• Que non acredite o cumprimento dos requisitos establecidos pola normativa estatal ou autonómica vixente.

• Que se formule unha proposta de extinción do programa ao abeiro dos procesos de revisión e mellora do título de acordo co procedemento aprobado pola universidade.

• Que concorra calquera situación excepcional que impida o correcto desenvolvemento do programa de doutoramento.

A extinción producirá os seguintes efectos:

• Comportará a perda do seu carácter oficial e a baixa no RUCT.

• Non se poderá matricular novo alumnado no programa de doutoramento.

• En calquera caso todo o alumnado afectado deberá ser informado da extinción e das consecuencias desta no relativo ao desenvolvemento dos seus estudos.

A Universidade adoptará as medidas necesarias para garantir os dereitos académicos do alumnado que estea cursando os ditos estudos nos termos establecidos na resolución de extinción do plan de estudo, e aprobará o procedemento de extinción dos programas de doutoramento no seo da universidade.

Comprensión sistemática dun campo de estudo e dominio das habilidades e métodos de investigación relacionados co devandito campo.
• Capacidade de concibir, deseñar ou crear, por en práctica e adoptar un proceso substancial de investigación ou creación.
• Capacidade para contribuír á ampliación das fronteiras do coñecemento a través dunha investigación orixinal.
• Capacidade de realizar unha análise crítica e de avaliación e síntese de ideas novas e complexas.
• Capacidade de comunicación coa comunidade académica e científica e coa sociedade en xeral acerca dos seus ámbitos de coñecemento nos modos e idiomas de uso habitual na súa comunidade científica internacional.
• Capacidade de fomentar, en contextos académicos e profesionais, o avance científico, tecnolóxico, social, artístico ou cultural dentro dunha sociedade baseada no coñecemento.

• Dominar técnicas, métodos e aproximacións en ciencia política que permitan dar conta da natureza produtiva de preferencias e identidades, e non meramente reflexiva e exósena, en que consiste a actividade política nas sociedades contemporáneas.
• Adquirir capacidade investigadora actualizada, é dicir, incorporando os novos modelos de investigación, as dinámicas colectivas de investigación (grupos internacionais de investigación) e a existencia de programas e fontes internacionais de referencia.

• Adquirir capacidade investigadora actualizada, é dicir, incorporando os novos modelos de investigación, as dinámicas colectivas de investigación (grupos internacionais de investigación) e a existencia de programas e fontes internacionais de referencia.
• Dominar técnicas, métodos e aproximacións en ciencia política que permitan dar conta da natureza produtiva de preferencias e identidades, e non meramente reflexiva e exóxena, en que consiste a actividade política nas sociedades contemporáneas.