Máster Universitario en Saúde Pública

• Memoria do título

Créditos que debe realizar o alumno para obter o título:
Materias Obrigatorias: 27 ECTS;
Materias Optativas: 15 ECTS;
Prácticas externas obrigatorias: 6 ECTS;
Traballo Fin de Máster: 12 ECTS;
Créditos Totais a realizar: 60 ECTS.

Non se contemplan

Modalidade: matrícula directa

Titulacións de Acceso:
1. Titulacións preferencia nivel 1:
Licenciatura ou grao en Medicina, Odontoloxía, Farmacia, Veterinaria, , Psicoloxía, Pedagoxía, Psicopedagoxía; Diplomatura ou grao en Enfermaría.
2. Titulacións preferencia nivel 2:
Licenciatura ou grao en Ciencia e Tecnoloxía dos Alimentos; Diplomatura ou grao en Nutrición Humana e Dietética, Óptica e Optometría.
3. Titulacións preferencia nivel 3:
Licenciatura ou grao en Ciencias Ambientais, Bioloxía, Socioloxía, Xornalismo; Diplomatura ou grao en Fisioterapia, Podoloxía.
4. Titulacións preferencia nivel 4:
Outras titulacións

Os alumnos procedentes de países de lingua diferente ao galego, portugués ou español deberán acreditar o nivel de lingua galega: Celga II, ou española: B1, consonte o Acordo do Consello de Goberno da USC do 30 de xullo de 2018.

De non posuíren algún dos títulos, a USC realizaralles unha proba de nivel e, de non superala, deberán asistir a un curso intensivo de galego ou español no primeiro semestre até acadaren o nivel requirido.

Mobilidade

A mobilidade dos/as estudantes está regulada a través do “Regulamento de intercambios interuniversitarios”. A través da Oficina de Relacións Exteriores xestiónanse programas de intercambio tanto nacionais (SICUE), como europeos (ERASMUS) e extracomunitarios (intercambios con países de América Latina ou países de fala inglesa): Portal Internacional

Prácticas

A adecuada formación destes profesionais esixe a realización durante o seu proceso formativo de prácticas en unidades administrativas con funcións de saúde pública da Consellería de Sanidade e en centros e unidades de atención especializada e atención primaria do SERGAS.
A diferente formación de base dos alumnos e a súa diferente orientación profesional dentro do amplo campo da Saúde Pública, aconsella que a formación práctica sexa máis personalizada e responda na medida do posible á orientación profesional que o alumno prefira.
Para ese efecto, o alumno elaborará de acordo co seu titor, e propoñerá á Comisión Académica do Master, coa antelación suficiente, un programa de prácticas acorde coa súa formación de base e orientación profesional futura dentro do campo da Saúde Pública, seleccionando os contidos entre os que se ofertan. O devandito programa de prácticas debe ser aprobado pola Comisión Académica do Master que poderá realizar as modificacións que considere oportunas, tras o cal asignaráselle o /os lugares onde realizará as prácticas.
Comprende unha avaliación continuada e unha avaliación final. A avaliación continuada será realizada polo titor académico durante o tempo de realización das mesmas. Ao finalizar as prácticas, para a avaliación final, o alumno debe presentar unha Memoria de prácticas na que detalle todas as actividades realizadas. Dita Memoria debe levar o visto bó do Titor. A avaliación final será realizada por unha Comisión nomeada pola Comisión Académica do Master, que estará integrada por tres profesores do Master entre os que estará o Coordinador de prácticas e o Titor académico. Na avaliación final terase en conta o informe do titor académico sobre a avaliación continuada así como a memoria presentada polo alumno.
Entre os contidos das prácticas temos: vixilancia epidemiolóxica, control das enfermidades transmisibles, seguridade alimentaria, sanidade ambiental, estilos de vida saudables, promoción da saúde, educación para a saúde, inspección sanitaria e laboratorios de saúde pública, etc.
O Director do Master nomeará entre os membros do equipo de dirección ao Coordinador de Prácticas. A súa misión será coordinar todo o proceso de prácticas nas institucións sanitarias; participar na asignación de titores de prácticas, e coordinar o seguimento e avaliación das prácticas desde o punto de vista académico. Así mesmo será o responsable de asinar as actas de prácticas externas conforme aos criterios de avaliación que se fixen e de acordo co procedemento de avaliación xa establecido.
Así mesmo designarase un Titor académico que será un profesor do Master, nomeado pola Comisión Académica para cada práctica ofertada, coa misión de facer un seguimento máis directo da práctica, dar resposta ás expectativas formativas establecidas, asegurar o seu correcto desenvolvemento e informar en primeira instancia sobre as memorias de prácticas entregadas polo estudante.

Terá unha extensión de 12 créditos. Poderá consistir nun traballo empírico relacionado con calquera das liñas de investigación que se ofertan no Máster, ou ben nunha achega eminentemente teórica, que recolla a revisión bibliográfica actualizada, exhaustiva, sistematizada e crítica sobre algún aspecto de coñecemento vinculado a estas liñas, xunto cunha proposta de investigación detallada destinada á resolución dun problema científico suscitado nese ámbito.
O TFM consistirá nun traballo orixinal dirixido por un ou máis profesores do equipo docente. Este traballo iniciará ao alumno na investigación científica, permitíndolle adquirir as destrezas, técnicas, coñecementos sobre a materia e capacidade de análise e crítica para desenvolver un posible labor investigador.
Este traballo inclúe tanto actividades presenciais (asistencia a sesións de autorización individual, presentación e defensa pública dos proxectos suscitados) como non presenciais (revisión bibliográfica actualizada e completa en referencia a un tema, deseño da investigación, tratamento estatístico dos datos, interpretación e discusión de resultados, elaboración de conclusións, redacción do informe final, ensaios para a defensa oral do traballo).
No referente á avaliación, seguirase unha metodoloxía uniforme en que se valorará o rendemento e as habilidades adquiridas a través dunha combinación equilibrada entre actividades de avaliación formativa e de avaliación final. A primeira debe valorar o esforzo e o progreso na aprendizaxe, e incentivar unha dedicación constante á materia. A segunda permitirá valorar os resultados da aprendizaxe.

O Máster organízase desde a Área de Medicina Preventiva e Saúde Pública e conta ademais con profesores de Análise Económica e Estatística, así como con profesionais da Dirección Xeral de Innovación e Xestión de Saúde Pública da Xunta de Galicia e técnicos do campo da intervención comunitaria.

A Área de Medicina Preventiva e Saúde Pública da USC é referencia internacional en investigación en Saúde Pública. Está integrada no Centro de Investigación Biomédica en Rede (CIBER) desde 2006, que inclúe os grupos máis competitivos a nivel nacional. É Grupo de Referencia Competitiva da Xunta de Galicia e está integrada no Instituto de Investigación Sanitaria de Santiago de Compostela (IDIS), acreditado polo Instituto de Saúde Carlos III. A última avaliación deste organismo situouna en 5º lugar en Excelencia Científica entre os 43 grupos do IDIS. A Área ven colaborando con múltiples centros de prestixio como a OMS, as universidades de Harvard, Brown, Aveiro ou o Centro Nacional de Epidemioloxía.